Work Text:
Зярдо тесэ ушодсь эрямо Дэймон, Эймонд мелявтсь сонзэ кухнядонзо. Дэймондо икеле кухнясь ульнесь таркакс, конанть азорокс ульнесь Эймонд. Аватне ды эйкакштнэ сакшность тей ансяк ярсамс. Умок ютась шкась, зярдо сонсь Алисэнт валске тейнесь тесэ бутербродт вишка Эйгоннэнь, Хелейнанень, Эймондонень, Дэйроннэнь ды чийнесь важодемань таркав. Оштё седе умок прядовсь шкась, зярдо тетяст паннесь тесэ сонзэ фирменной туво сывель эмежть марто. Ней Эймонд ульнесь тесэ пазокс, инязорокс. Весе ладось кухнясонть теезель Эймондонь коензэ туртов. Ансяк вана лиссь шайтянонь Дэймон.
Уцяскантень, бути Эймонд стякшнось сисемс чассто, Дэймон эзь варшта сонзэ кавалонь пизэстэ, зярс эзь са валскенть кеменце часозо. Дэймон свал путокшность пенчт-вакант мекев те тарказонть, конанть кочкизе сынст туртов Эймонд. Ансяк течи Эймонд мекс-бути эзь муе сонзэ умарень пеелензэ. Васня сон арсесь истожамс Дэймононь коньяк марто суликанть, конанть муизе эсензэ кухнясонзо оштё Дэймононь самодонзо мейле васенце чистэнть. Ансяк те неявсь вельть лавшокс, эйкакшонь ладсо. Секс сон кадовсь кухнясонть учомс Дэймононь. Сон натой ушодсь пидемс ям седе натуральной ладсо неявомга. Зярдо Дэймон совась – кодамояк рок седямо-морамо кужонь футболкасо ды пондакш черьпулонзо марто, Эймонд аштесь озадо ды керясь помидорат.
– Косо умарень пеелем?
Дэймон сась тензэ ды комась тензэ, нежедезь кедьсэнзэ столенть лангс. Сон ушодсь ёвтамо калгодосто:
– Тон видечисат, мон ковгак ёртыя тонь вечкевикс умарень пеелеть, зярдо вешнинь калонь васоньпеельть. Бути теть мельстуицясто, мон овсе а виздян, – Эймонд лепштизе пеелензэ, конасонть керясь помидорат. – Улиндеряй мелеть куловтомс эйсэнь сень кис, мон витьстэ ёвтса: тонь арасть зняро виеть.
Дэймон вансь лангозонзо верде алов, Эймонд каршонзо секе ладсо вансь Дэймононь лангс телень якшамодо кельме вановтсонзо.
Апак учо Дэймон ёвтась пейдиця вайгельсэ:
– Ансяк муйса пееленть ды, улиндеряй мелеть, невтьса, кода куроксто керямс умарть истя пеельтеме. Те алкукс седе куроксто ды кадовсь седе ламо умарьде.
Эймонд эзь ёвта «Эно, ули мелем», сон овсе мезеяк эзь ёвта Дэймоннэнь, ансяк вансь, кода сон кери умарть стяконь пеельсэ. Зярдо сон сыця чистэ снартнесь теемс истя жо, лиссь алкукс седе куроксто.